БАКТЕРИЯЛЫК КУРАЛ

БАКТЕРИЯЛЫК КУРАЛ, б и о л о г и я л ы к к у р а л – адамдарды, жаныбарларды жана өсүмдүктөрдү массалык түрдө дартка чалдык­тыруу же өлтүрүү максатында микроорганизм­дердин оору козгоочу касиетине негизделген биологиялык каражат. Бактериялык куралдын негизги жабыркатуу­чулары – бактерия, вирус, рикетсия, козу карын­дар жана алардын ти­ричилигинен пайда болгон уулар – ток­синдер. Алар согуш­тук максатта колдо­нулуп, курт-кумурс­ка, кемирүүчү, кене жана башкалардын, жардамы менен, ошондой эле суспензия, күкүм түрүндө тара­тылат. Бактериялык каражаттарды тара­тууда атайын ракета, артиллериялык снаряд, авиациялык бомба ж. б. да пайдаланы­лат. Аз күч жана каражат жумшап, өтө чоң аянтты жабыркатуу­га болот. Ал орга­низмге өтө аз өл­чөмдө киргенде эле жабыркатат (оору­тат). Айрым оору коз­гогучтардан пайда болгон жугуштуу оорулар, белгилүү шартта оорунун бир очогунан башка жер­ге тарап, көптөгөн адамга жугат (эпидемия). 1925-жылы Женева протоколу жана 1972-жылы БУУ конвен­циясы менен Бактериялык куралды колдонууга тыюу салынган. Бактериялык куралды колдонуу адамзатка каршы эң чоң кылмыш болуп эсеп­телет. Ал жалпы кабыл алынган эл аралык укукту орой бузгандыкка жатат. Бактериялык куралды колдонуу коркунучу аскерлерди жана элди коргоо боюнча натыйжалуу чараларды даярдоону талап кылат. Аларга эпидемияга каршы санитария-гигиеналык жана дарылоо чаралары, элди жана армияны инфекциядан сактануу чаралары менен тааныш­тыруу (эмдөө, шашылыш алдын алуу, маска та­гынуу), элди атайын жабдылган жабык жер­лер менен камсыздоо, тамак-ашты, сууну, өсүмдүк жана жаныбарларды коргоо кирет.