АЛЫШБАЕВ Жумагул

АЛЫШБАЕВ Жумагул [05. 09. 1922, СССР, РСФСР, Кара-Кыргыз автономиялуу облусу, Жети-Суу облусу, Каракол уезди, Кең-Суу болуштугу (азыркы Ысык-Көл облусу, Ак-Суу району, Кереге-Таш айылы) – 15. 08. 1969, Кыргыз ССРи, Фрунзе шаары] – экономист, экономика илимдеринин доктору (1966), профессор (1967), Кыргыз ССР ИАнын академиги (1964). Пржевальск педагогикалык окуу жайын бүткөн (1939). Кочкор районунда орто мектепте мугалим, окуу бөлүмүнүн башчысы болуп иштеген. 1940-жылы Саратов шаарындагы Волга аскердик округунун танк айдоочулардын окуу жайында окуган. 1941-жылдын июнь айынан Улуу Ата Мекендик согушка катышып, танк ротасынын командири катары Батыш, Воронеж жана Борбордук фронтторунда салгылашкан. 1943-жылы 21–29-июлда Тросна айлына (азыркы Россия Федерациясы, Орел облусу) жакын жеке өзү душмандын бир танкын, эки ок атуу позициясын жана 20дай жоокерин жок кылып, эрдик көрсөткөн. Лаврово шаарынын (Тамбов облусу) жанындагы салгылашууда жаракат алган. 1943–1944-жылдары Биринчи Беларус фронтунда кенже лейтенанттарды даярдоочу курста улук инструктор, 1944–1945-жылдары Орел аскер округунда аскер бөлүгүнүн штабынын башчысы болуп аскердик кызмат өтөгөн. 1945-1947-жылдары Кыргызстан ЛKCM Талас обкомунун секретары, Кыргызстан ЛKCM БКнын секретары. 1947-1953-жылдары Москвадагы Жогорку партиялык мектепте жана КПСС БКнын алдындагы коомдук илимдер академиясынын аспирантурасында окуган. 1953-1954-жылдары Кыргызстан КП БКнын алдындагы республикалык партиялык мектепте директор, Кыргыз ССР ИАнын вице-президенти (1956-1958), Кыргыз ССР ИАнын экономика институтунда сектор башчы (1958-1968), Кыргыз Совет энциклопедиясынын Башкы редакторунун орун басары (1968-1969) болуп иштеген.

Алышбаев конкреттүү экономиканын айрым тармактары, экономика теориясы боюнча адис катары 200дөн ашуун илимий эмгек жазган. Эмгектеринде

Кыргызстанда өнөр жай курулушу жөнүндөгү маселелер каралып, өнөр жайынын рационалдуу өнүгүү багыты, ыңгайлуу жайгаштыруу жолдору далилденген. Кыргыз элинин тарыхындагы алгачкы көп томдуу улуттук-универсал энциклопедия – КСЭни даярдап чыгаруу үчүн түзүлгөн Башкы редакцияны уюштурууга жана болочок энциклопедиянын сөздүгүн түзүүгө зор эмгек жумшаган. Кызыл Жылдыз, эки II даражадагы Ата Мекендик Согуш ордени, Эмгек Кызыл Туу, «Ардак Белгиси» ордендери жана медалдар менен сыйланган. Ысмы туулуп-өскөн айылындагы орто мектепке берилген.
Эмг.: Перспективы и проблемы развития тяжёлой промышленности в Киргизии. Ф., 1965; Экономикалык илимдердин милдеттери жана анын кээ бир актуалдуу маселелери жөнүндө, Ф., 1969.