НЕЙРОДЕРМИТ

НЕЙРОДЕРМЙТ (нейро... жана грекче йегша - тери) - теринин нерв-аллергиялык оорусу. Мында дене дүүлүгүп кычышат, тери кургайт, кийинчерээк өзгөрөт. Н. түрлүү экзогендик жана эндогендик факторлордун таасиринен болушу мүмкүн. Нерв системасынын, ички секреция бездеринин, зат алмашуунун бузулушу, тукум куугучтук, ичеги карын оорулары чоң мааниге ээ. Н-тин диффу­зиялык (таралган) жана чектелген түрү бар. Диф­фузиялык Н. көбүнчө жаш балдарда кездешет. Буга балдардын экзема, диатез оорулары түрткү берет. Көбүнчө бут, колдун салаасы, тизе муун­дары, билектин ички бети, моюн териси ж. б. кычышып, тырмаганда издер даана көрүнөт, тери дүрдүйүп, калыңданат, кээде майда ириң­дүү жаралар пайда болот. Ооздун тегереги, көздүн айланасы кызарып, кабырчактар көбөйөт. Бала чыргоолонуп, бат чарчайт, уйку­су качып, тамакка табити тартпайт. Чектелген Н. менен демейде чоң кишилер ооруйт. Ал моюн, желке, сандын ич жагы, жыныс органдарынын тегерегинде пайда болот. Н. күз, кыш айларын­да бат-бат кармап, жайында басандайт. Дары­лоону врач жүргүзөт. Туура тамактануу (вита­миндүү), өз убагында эс алуу, санаторий-курортто дарылануу сунуш кылынат. Алдын алууда эм­гек жана эс алуу, тамактануу режимин сактоо, нерв-психикалык чарчоодон сактануу, баланын диатез жана экзема ооруларын жакшы дарылоо, терини суук менен ысыктан жана түрдүү дүүлүктүр­гүчтөрдөн (химиялык ж. б.) коргоо зарыл.