БАЛАПАНДУУ КУШТАР

БАЛАПАНДУУ КУШТАР (кызыл эт балапан­дуу куштар) – жөжөлүү куштардан айырмала­нып жумурткасында сарысы (азык-заты) аз бол­гондуктан, эмбриондук өөрчүү мөөнөтү кыска болгон куштар тобу. Балапаны алсыз, булчуңу начар, сокур, денеси жүнсүз же сейрек тыбыт менен капталып, дене температурасы туруксуз болот. Алар көпкө чейин уяда болуп, ата-энелери аларды жылытып, тамак ташып багышат. Буларга калак буттуулар, көгүчкөндөр, күкүктөр, то­ту куштар, тоңкулдак сымалдар, таранчылар ж. б. кирет. Айрым куштар, мисалы, үкүлөр, жырт­кыч куштар, жөжөлүү куштар менен балапандуу куштардын ортосундагы аралык орунду ээлейт. Алардын балапандары жумурткадан чыкканда эле калың тыбыт менен капталган болот, жырткыч куштардын ба­лапандарынын көзү көрөт.