БАКАЕВ Ашырбек Бешкемпир уулу
БАКАЕВ Ашырбек Бешкемпир уулу [20. 12. 1948, СССР, Кыргыз ССРи, Чүй облусу, Ворошилов (азыркы Аламүдүн) району, Таш-Дөбө айылы] – генерал-майор (2000). 1966–1967-жылдары Чаек эт комбинатында оператор, Фрунзе шаарындагы курулуш-монтаждоо колоннасында жумушчу, 1967–1970-жылдары Советтик Армиянын катарында курсант, 1970-жылы СССР ИИМдин Оржоникидзе аскердик-командалык окуу жайын (1970), Целиноград мамлекеттик педагогикалык институтунун филология факультетин (1985), КУУнун юридика факультетин (1999) бүткөн. 1975–1987-жылдарда Алматы шаарында взвод командири, башкы полктун командири, Казакстандын ички аскерлер штабынын начальнигинин орун басары жана республикалык гвардиясынын аскердик күжүрмөн даярдык бөлүмүнүн на-
чальниги. 1987–1988-жылдары Афганстанда аскердик улук кеңешчи, партиялык уюмдун катчысынын орун басары. 1995 – 1997-жылдарда Кыргыз Республикасынын Ички Иштер министрлигинин алдындагы ички аскерлер командачысынын 1-орун басары – штаб начальниги, 1997–1999-жылдарда Ош, Жалал-Абад облустарында аскер бөлүктөрүнүн курамын камтыган 3-бригаданы уюштурган жана анын командири, 1999-жылдан КР ИИМдин ички аскерлер командачысы. 1999-жылы ал жетектеген ички аскерлердин курама «Шер» отряды Баткен аймагында террорчуларга каршы согуштук аракеттерде күжүрмөндүгү менен айырмаланган. Бакаев – көптөгөн макала, монографиялардын жана Кыргыз Республикасынын Куралдуу Күчтөрүндө пайдаланылып жаткан 100дөн ашык аскердик терминдердин автору. «СССР Куралдуу Күчтөрүндө Ата мекенге кызмат кылгандыгы үчүн» 1-, 2-, 3-даражадагы, Афганстандын 1-даражадагы Алтын жылдыз, Россиянын «Ата мекен алдындагы сиңирген эмгеги үчүн», 1-даражадагы «Улуу Пётр» ордендери жана медалдар, Эрдик медалы менен сыйланган. КРдин Өкмөтүнүн Алтын дипломунун лауреаты (2003). Самбо федерациясынын ардактуу президенти.