АЛДЫ-ЖАР (АЛДЫЯР) КӨМҮР КЕНИ

АЛДЫ-ЖАР (АЛДЫЯР) КӨМҮР КЕНИ Ош облусунун Өзгөн, Кара-Кулжа жана Алай райондорунун чек араларында. Кара-Суу темир жол бекетинен 85 км түштүк-чыгыш тарапта. Биринчи маалымат 1934-жылы Куршаб жана Гүлчө көмүр казуу артелдеринен алынган. 1953‒54-жылдары издөө, 1974‒75-жылдары чалгындоо иштери жүргүзүлгөн. Көмүр юра мезгилинде пайда болгон чөкмөлөр менен байланышкан. Бардыгы 4 кабат, анын ичинде биринчи (астыӊкы) кабат өндүрүштүк мааниге ээ. Анын калыӊдыгы 0,1 мден 7,65 мге чейин өзгөрөт. Көмүрдүн орточо күлдүүлүгү 24%. Көмүр таш көмүрдүн узун жалындуу (Д) маркасына кирет. Күйүүнүн орточо жылуулугу 32,1 МДж/кгды түзөт. Көмүр кабаттарынын жердин үстүнө чыккан айрым жерлеринде көмүрдү ачык жол менен казып алууга болот. Жалпы геологиялык запасы 45 млн т.