АКЦИЯ

(лат. actio ‒ аракет, иш, операция) ‒ акционердик коом (АК) тарабынан жүгүртүү үчүн чыгарылуучу ж-а анын ээсине (акционерге ) АКнын кирешесинин бир бөлүгүн дивиденд түрүндө алууга, АКны башкарууга үлүштүк катышка, АК жоюлган учурда калган мүлктүн бир бөлүгүн, ошол коомдун жаӊы чыккан акцияларын адегенде алууга, рынокто эркин сатып алуу ‒ сатууга укук берүүчү баалуу кагаз. А-да көрсөтүлгөн акча суммасы анын номиналдык наркын, ал эми А. курсу ‒ баалуу кагаздар рыногунда А. жүгүртүлүүчү бааны (рынок наркы) билдирет. А. төмөнкү реквизиттерди камтыйт: баалуу кагаздын аталышы; эмитенттин аталышы ж-а анын жайгашкан орду; катар номери; номиналдык наркы; чыгарылган акциялардын саны; чыккан датасы; түрү (жөнөкөй же артыкчылыктуу); чыккан датага карата АК уставдык капиталынын өлчөмү; дивиденддерди төлөө мөөнөтү; ээсинин аты-жөнү (даректүү акция үчүн); каттоочунун ж-а банк-агенттин аталышы ж-а жайгашкан орду; эмитенттин колтамгасы ж-а мөөрү. А. фонд биржаларында ж-а фонд рыногунун компьютердик биржадан тышкаркы системасы аркылуу адис ортомчулардын (брокерлердин ж-а дилерлердин) жардамы м-н сатылат ж-а сатып алынат. Кырг-нда акционердик коомдор пайда болгондон тартып А. чыгарыла баштады.