АКМАТОВ Таштанбек
АКМАТОВ Таштанбек (15. 03. 1938‑жылы туулган, Ысык-Көл облусу, Тоң району, Көк‑Сай айылы) – мал чарба өндүрүшүнүн новатору, эки жолку Социалисттик Эмгектин
Баатыры (1976, 1986), Кыргыз Республикасынын Баатыры, СССР мамлекеттик сыйлыгынын лауреаты (1982). 1977‑жылы К. И. Скрябин атындагы Кыргыз айыл чарба институтун бүткөн. 1955‑жылдан Ысык-Көл облусунун Тоң районундагы 22‑партсъезд атындагы колхоздо чабандын жардамчысы, баш чабан болуп иштеп, 1976-1982‑жылдары койдон төл жана жүн алууда эң жогорку көрсөткүчтөргө жетишкен. 1982-жылдан ирилештирилген чабандык бригада түзүп, бригадада ар жүз тубар койдон 143төн козу, ар койдон 5,1 кгдан жүн кыркып алган (1983‑1985). 1987‑1991‑жылдарда Кыргыз ССР Жогорку Советинин Президиумунун председатели, 1989-1991‑жылдарда СССР Жогорку Советинин, 1987‑1990‑жылдарда Кыргыз ССР Жогорку Советинин депутаты. Үч Ленин, эки Эмгек Кызыл Туу ордендери жана медалдар менен сыйланган. Акматовдун коло бюсту Тоң районунун Ак‑Сай айылына тургузулган (1988, айкелчиси Т. Садыков).