«АК МАРАЛ» МАМЛЕКЕТТИК БИЙ
«АК МАРАЛ» – Н. Түгөлов атындагы Кыргыз улуттук филармониясынын алдындагы бийчилер ансамбли. 1939‑жылы Москвада өткөн кыргыз искусствосунун 1-декадасына карата балетмейстерлер Н. С. Холфин, В. В. Козловдун жетекчилиги менен уюштурулган, бирок декададан кийин ал өз ишин токтоткон. 1957‑1960‑жылдары 20 бийчиден турган элдик бий ансамбли орус, украин жана башка элдердин бийлеринен концерттик программа түзүшкөн. 1966‑жылы Н. Түгөловдун көркөм жетекчилиги менен ансамбль кайрадан уюштурулган. 1977‑1983‑жылдары ансамблдин көркөм жетекчиси жана башкы балетмейстери Кыргыз Республикасынын эл артисти К. Мадемилова, 1983-жылдан Кыргыз Республикасынын эл артисти, балетмейстер М. Асылбашев. 1988‑жылдан ансамбль азыркы аталышта, 1991‑жылы Кыргыз Республикасынын эл артисти Н. Түгөловдун ысымы берилген.
Ансамблдин концерттик программаларын кыргыз, казак, башкыр, татар, түркмөн, өзбек, азербайжан эл бийлери, «Европа бий музыкасы» аттуу бөлүмдөр түзөт. «Тамаша», лирикалык «Ак куу», «Ак тамак, Көк тамак», «Миң кыял», «Эл достугу» бий сюитасы, «Сары өзөн баяны», «Саринжи‑Бөкөй», «Беш ыргай», «Тогуз кайрык», «Маш ботой» жана башка бийлер туруктуу репертуарга айланган. Ансамбль Түркияда, Германияда, Францияда, Малайзияда, Индияда жана башка чет өлкөлөрдө гастролдо болгон.
