АФШАРЛАР

АФШАРЛАР‒ Ирандын түндүк-батышы менен түндүк-чыгышында жана Афганистандын түндүк-батышындагы түрк уруулар тобу. Саны болжол менен 300 миң адам (2000). Ирандын түндүк-батышындагылары азербайжандарга, Афганистандын жана Ирандын башка райондорунда жашагандары түркмөндөргө жакын. Алар азери тилинин таасири астында түштүкогуз диалектилеринде сүйлөшөт. Ислам динин (Афганистандагылар суннит мусулмандары жана Ирандагылар шиит имамиттери) тутушат. 16-кылымда Афшарлардын ата-бабалары Сефевиддер тарабынан Ирандын түндүк-батышынан (Түштүк Азербайжан) өзбектерге каршы күрөшүү үчүн Хорасанга отурукташкан. Афшарларды экинчи жолу 1729–30-жылдары Кырклунун Афшар уруусунан чыккан Надир Шах көчүрүп келген. Алардын айрымдары Мияб жана Кубеган, калгандары Мешхед жана Келат райондоруна отурукташкан. Айрым топтор Кабулга жана Кандагарга чейин жетип, калктуу конуштарды ээлешкен. Афшарлар тобунун бир бөлүгү (Хорасандын жергиликтүү тургундары) Түркиянын түндүгүндөгү Кызыл-Ирмак дарыясынын өрөөнүнө көчүп барып, түрктөр менен ассимиляцияланган. Алар негизинен мал чарбачылык жана дыйканчылык менен кесиптенишет. Аялдары жүндөн килем, таар, кездеме токушат. Афшарлар топурактан согулган, үстү жыгач менен жабылган үйлөрдө жашашат.