АК-СУУ Москва районундагы суу

АК-СУУ ‒ Москва районундагы суу, Чүй дарыясынын сол куймасы. Узундугу 155 км, алабынын аянты 483 км². Кыргыз Ала-Тоосунун түндүк капталындагы мөӊгүлөрдөн башталып, Жар-Таш жана Чоӊ-Таш суулары кошулгандан кийин Ак-Суу аталат. Жогорку агымы кууш капчыгай аркылуу агып, Чүй өрөөнүнө чыкканда нугу кеӊейип, тайыздай баштайт. Куймалары: Жарды-Суу, Темене, Ак-Башат, Чоӊ Таш, Бултуке ж. б. Алабында аянты 4,21 км²ге жеткен 77 майда көл бар. Май айында кирип, октябрда тартылат. Жылдык орточо чыгымы 3,80 м³/сек; эӊ көбү ‒ 11,8 м³/сек, эӊ азы ‒ 1,45 м³/сек. Сугатка пайдаланылат. Жээгинде Ак-Башат, Жарды-Суу, Кепер-Арык, Төмөн-Суу, Ак-Суу, Мураке, Ак-Торпок кыштагы жайгашкан.