АК-СУУ (КАРАКОЛ) КУМ-ШАГЫЛ КЕНИ

АК-СУУ (КАРАКОЛ) КУМ-ШАГЫЛ КЕНИ Ысык-Көл облусунун Ак-Суу районунда, Каракол шаарынан 4 км чыгышта, Каракол суусунун боюнда, деӊиз деӊгээлинен 1845‒1955 м бийиктикте. 1965-жылы геологиялык чалгындоо жумуштары жүргүзүлүп, запасы эсептелген. Кен аймагын антропогендин чөкмө тектери түзөт. Шагыл менен кумдан турган аллювий чөгүндүлөрүнөн пайда болгон. Кум-шагыл катмарынын калыӊдыгы 100 мге чейин. Гранит, диорит, кумдук, сланец жана акиташ тектеринин сыныктарынан турат. Начар жумуруланган кесек шагылдуу. Кум чопо менен камдашкан. Кесекчелердин 40 ммден ирилери 40% (ошондуктан шагылды майдалоого сунуш кылынат), 5 ммден майдалары 30%, жалпак формадагысы 8%, көлөмдүк массасы 1500 кг/м³. Кум ири бүртүкчөлүү, полимиктүү (кесектик модулу 2,4‒2,5), арасында 16%ке чейин чаӊ жана чопо бар. Көлөмдүк массасы 1400 кг/м³, органикалык кошундулар жок, слюда 1%. Кендеги кум-шагылдан «400» маркасындагы бетон жасалат, жол курулушуна пайдаланылат. Запасы А+В+С₁ категориясы боюнча 11654 миӊ м³. 1997-ж. карата баланстагы запасы: В ‒ 824 миӊ м³, С₁ ‒ 7608 миӊ м³, В+ С₁ ‒ 8432 миӊ м³, С₂ ‒ 6269 миӊ м³.