АДЕНОВИРУС ООРУЛАРЫ
АДЕНОВИРУС ООРУЛАРЫ – кишинин жана жаныбарлардын аденовирустар козгоочу жугуштуу оорусу. Мында кишинин көзүнүн, ичегисинин, дем алуу жолунун былжыр челдери сезгенет. Энеден берилген иммунитет балада 6 айга чейин сакталат. Аденовирус оорулары бейтап адамдан, вирус алып жүрүүчүдөн, ошондой эле оорулуу колдонгон буюмдан, идиштен жугат. Оорунун жашыруун мезгили 3‑14 күн. Аденовирус ооруларында эти ысыйт, алы кетет, башы ооруйт, окшуп, кусат. Кээде оору грипп сыяктуу капысынан башталат. Дене ысып, мурун бүтөт, көз жапкактары кызарып, көздөн жаш агып, бир нерсе түшкөндөй өйкөйт. Шилекей жуткурбай тамагы ооруйт. Айрым учурда каргылданып үнү бүтөт, деми кыстыгып, дем алуу кыйындайт, жөтөлөт. Кээде ичеги‑карын сезгенип, ич өтөт. Дарылоодо антибиотиктер жана витаминдер колдонулат. Аденовирус оорулары жаныбарларда дем алуу, тамак сиңирүү органдарын жабыркатып, катуу өтөт, конъюнктивит да болот. Кой, эчки, бодо мал, жылкы, чочко, ит, куштар оорушат. Диагнозу, клиникалык белгилери лабораториялык жол менен аныкталат.