АДАБИЙ ВИКТОРИНА

АДАБИЙ ВИКТОРИНА – кандайдыр бир тематиканын айланасындагы суроолорго жооп берүүгө ылайык суроо-жооптордон турат. Викторина жооп берүүчүлөрдүн билиминин кенендигин, ар тараптуулугун, далилдеринин реалдуулугун талап кылат, ага катышуу менен көп кызыктуу, пайдалуу маалыматтарды билүүгө болот, тапкычтыкты, ой жүгүртүүнү, эске тутууну калыптайт, байланыштуу речти өстүрүүгө көмөктөшөт. Викторина бир жазуучунун өмүрү, чыгармачылыгына, же бир конкреттүү чыгармасына, же белгилүү бир мезгилдеги адабий процесске, болбосо бир тематикага арналып түзүлүшү мүмкүн. Аны өткөрүүнүн жолдору да ар кыл: кээде бир окуучу көпчүлүккө суроо берет, же болбосо эки тарапка (командаларга) бөлүнүп, бири-бирине суроо таштайт: жоопторду оозеки да, жазма түрүндө да алууга болот. Ошондой эле айрым учурда викторинанын суроолору алдын ала окуучуларга таратылат, же класска, болбосо адабият кабинеттерине коюлуп; мында жооптор жазуу түрүндө жыйналат жана калыстар тобу тарабынан текшерилет. Викторинанын суроолоруна жооп берүүдө конкреттүүлүк, программадан тышкаркы материалдарды билүү, көркөм фантазия, ойдун тактыгы, мисалдардын ишенимдүүлүгү, речтин түшүнүктүүлүгү үчүн аракеттенүү керек.