АЛТЫБАЕВ Каныбек

АЛТЫБАЕВ Каныбек Аманович (15. 7. 1942, Жалал-Абад облусу, Токтогул району, Көдүл айылы – 22. 4. 2005, Бишкек) – генерал-майор (1994). В. И. Ленин атындагы Ташкент командалык жогорку аскер окуу жайын (1966), «Аткычтар» жогорку курсун (1972) бүткөн. Окуу жайын бүткөндөн кийин Түркстан аскер округунда взводдун командири, 1974–79-жылдары Ош облусунун Майлы-Сай, Ош шаарларында саясий бөлүмдүн начальниги, Ноокат районунун аскер комиссариатында бөлүмдүн начальниги, 1979–80-жылдары Афганистандын Аскер Күчтөрүнүн техникалык департаментинин саясий бөлүмүнүн начальнигинин кеңешчиси, 1980–95-жылдары Ош облусунун аскер комиссары, 1996-жылдан укук коргоо органдарынын жана күч структураларынын ишин координациялоо бөлүмүнүн башчысы болуп иштеген.