АЙМУХАМЕДОВА Гулсым
АЙМУХАМЕДОВА Гулсым (Мария) Бурановна (1919‑жылы туулган, Челябинск облусу, Троицк шаары) – химик, техника илимдеринин доктору (1965), профессор (1967). Кыргыз ССРнин эмгек сиңирген ойлоп табуучусу (1975), Кыргыз ССРинин илимге эмгек сиңирген ишмери (1985). Москвадагы М. В. Ломоносов атындагы университетте окуган (1941), Кыргыз мамлекеттик педагогикалык институтту бүтүргөн (1945). 1943‑жылдан СССР ИАнын Кыргыз филиалынын, 1954‑жылдан Кыргыз ССР ИАнын химия институтунда, 1960‑жылдан органикалык химия институтунда лаборатория башчы, 1971‑жылдан директорунун орун басары, бөлүм башчы, консультант болуп иштеген. 1991‑жылдан КР УИАнын ардактуу академиги, химия жана химиялык технология институтунун башкы илимий кызматкери. Илимий эмгектери табигый бирикмелерди өндүрүүнүн химиясы жана химиялык технологиясына, өсүмдүк сырьёлорун кайра иштетүүгө арналган. Эмгек Кызыл Туу ордени жана медалдар менен сыйланган.
Эмг.: Пектиновые вещества и их определения (в соавторстве). Ф., 1964; Свойства и применение пектиновых сорбентов (в соавт.). Ф., 1984; Зависимость свойств пектиновых веществ от их метоксильной составляющей (в соавторстве). Ф., 1990.