ИСТРИЯ

ИСТРИЯ– тарыхый облус. Түштүк-Чыгыш Европада жайгашып, Истрия жарым аралын жана ага чектеш аймактарды камтыйт. Байыркы мезгилдерде бул аймакты истриялыктар (иллириялыктарга туугандаш уруулар) мекендеген. Б. з. ч. 2-кылымдан Рим бийлиги астында, 395-жылдан Батыш Рим империясынын курамында. 5-кылымдын аягынан Одоакр королдугуна, андан кийин Остгот королдугуна караган. 6-кылымдын 1-жарымынан Византиянын курамында. Болжол менен 788-жылы Франк мамлекетинин Фриуль (Фурлан) маркасынын бир бөлүгү болуп калган. 952-жылдан Бавария герцогдугунун курамына кирген, 11–12-кылымдарда Истрия кайрадан славян колониясына туш болгон. 1209-жылдан Истриянын бардык аймагы Аквилей патриархатына, 13-кылымдын аягынан Венециянын бийлигине баш ийген. 1797-жылы Венеция республикасы кулагандан кийин, анын Истриядагы ээлиги Австрияга өткөн. 1809-жылы Истрия Иллирия провинцияларынын, 1815–1918-жылдары Австрия империясынын курамына кирген (1867-жылдан Австрия-Венгрия). 1920-жылдагы Рапалло келишими боюнча Истриянын көп бөлүгү Италияга караган. Экинчи дүйнөлүк согуштан кийин ал Югославиянын карамагына өткөн (Триест шаарын жана анын айланасын эске албаганда, 1954-жылга чейин эркин аймак статусун сактап, андан кийин Италияга кошулган). 1991-жылдын июнь айынан Истриянын көпчүлүк бөлүгү көз карандысыз Хорватия республикасынын, түндүк бөлүгү Словениянын курамында.