ИБРАЕВ Анарбек
ИБРАЕВ Анарбек (1951-жылы туулган, Ысык-Көл облусу, Ак-Суу району, Тепке айлы) – ырчы, Кыргыз Республикасынын эмгек сиңирген артисти (1987), Кыргыз Республикасынын эл артисти (1999), Токтогул атындагы Мамлекеттик сыйлыктын лауреаты (2004), III даражадагы Манас орденинин ээси (2021).
Кыргыз маданиятында «ташка тамга баскандай» ырчылардын бири, белгилүү артист, үнүнүн диапазону кенен, элдик, лирикалык жана дүйнөлүк классикалык ырларды ийине жеткире аткарган Анарбек Ибраев Карамолдо Орозов атындагы эл аспаптар оркестринде, кийин Чоро Кожомжаров жетектеген алгачкы кыргыз эстрада ансамблинде солист болуп эмгектенген.
Чыгармачылык жолу
Т. Сатылганов атындагы филармониянын алдындагы эки жылдык студияны, Б. Бейшеналиева атындагы искусство институтунун ырдоо бөлүмүн бүтүргөн. Чыгармачылыгы 1970-жылдан башталган. Адегенде Ч. Кожомжаров жетектеген биринчи кыргыз эстрадасында, андан кийин К. Орозов атындагы эл аспаптар оркестринде солист болуп иштейт. Алгачкы аткарган чыгармалары «Эжелерим, агайым», (М. Рыскулов), «Таң сыры», «Үзүлбөгөн үмүттөр», «Сары-Челек» (С. Жумалиев), «Болбосо экен» (Ж. Касымбеков) жана башкалар. Ж. Шералиевдин «Кыргыз жайлоосу», «Эстей берем», Б. Тургунбаевдин «Туулган жер», Г. Чекиевдин «Кереметтүү көздөрүң», С. Жумалиевдин «Майрам шаңы», А. Керимбаевдин «Көл баяны», Б. Абдраимовдун «Ырымды сага арнаймын», «Махабат илеби», Т. Томотоевдин «Атама ант», С. Байтыгуловдун «Энекебай», Ш. Дүйшеналиевдин «Кумар көз» жана башка ырларды чебер аткарат. Жаштардын жана студенттердин Москва шаарында өткөн Бүткүл дүйнөлүк фестивалынын дипломаты (1985), Кыргызстан Ленин комсомолу сыйлыгынын лауреаты (1985). Италия, Франция, Тунис, Румыния жана башка өлкөлөрдө гастролдо болгон.
Эскерүүлөрү
Бала чагы Ысык-Көлдүн Тепке деген айылында өткөн. Башка жерден тартынып, кой жайып жүргөндө гана ырдачу. Бир күнү адатынча ырдап жатса, аркы беттен бир киши атайын бастырып келип угуп, абдан жакшы ырдаганын айтып мактайт. Чыныгы музыкага болгон ышкыбоздугу Каракол шаарында окуп жатканда ойгонот. Ошол мезгилде белгилүү кыргыз композитору Рыспай Абдыкадыровдун жаңы чыгып жаткан «Алмашым» деген ырын ырдап, өз чөйрөсүнө таанылат. Кийин Токтогул Сатылганов атындагы филармониядан Р. Абдыкадыровдун өзүнө жолугуп, «Алмашымдын» бир куплет ырын ырдап, окууга өтүп кетет.
Убагында улуу комузчу, элдик композитор, Кыргыз ССРинин эл артисти Ыбырай Тумановдун батасын алган Ибраев Анарбек өнөрдүн өтөсүнө чыктым деп ойлойт. Азыркы мезгилде педагогикалык ишмердиги менен алган тажрыйбасын, билимин жаштарга берүүдө. Анын көптөгөн таланттуу студенттери филармонияда солист.