АРА ТӨРӨЛГӨН БАЛА

АРА ТӨРӨЛГӨН БАЛА – бала бойго бүткөндөн кийин төрөт убактысына жетпей, 28—39 жумалык мөөнөтүндө төрөлгөн ымыркай. Ал температуранын өзгөрүшүнө чыдамсыз болуп, айлана-чөйрө шартына тез көнбөйт. Баланын ара төрөлүшүнө боюнда бар аялдын түрдүү ооруга жана кырсыкка чалдыгышы, талгактын оор түрү, ага чейин боюнан алдыруу, кош бойлуу учурда нерв психикалык күч келүү, оор жумуш, үй-бүлөдөгү чыр-чатак ж. б. жагымсыз шарттар себеп болот. Андай баланын мүчөзү толук өсүп жетилбеген – баш сөөгү жумшак, кулак калкандары жука, башына жабышып турат. Денесин тыбытка окшогон жүн баскан, териси жука, назик, бырышып, бүктөлүп турат. Ички органдары функциялык жактан толук жетилбеген. Соруу, изденүү, кармоо рефлекстери начар өнүккөн. Салмагы 1500 граммга жетпесе, атайын камера-кювезде багылат. Бала жаткан бөлмө жарык, таза болуш керек. Ара төрөлгөн баланы саалган эмчек сүтү менен, өтө начар төрөлгөн, соруу рефлекси жок бала зонд аркылуу (суткасына 10 жолу) тамактандырылат..