АНТРОПОМЕТРИЯ

АНТРОПОМЕТРИЯ (антропо... жана ...метрия) - адам денесинин морфологиялык өзгөчөлүгүн баалоо методдору менен ыкмаларынын жыйындысы. Ага бойду, салмакты, дененин сырткы келбетин, ошондой эле бир катар функциялык көрсөткүчтөрдү өлчөө кирет. Антропометрия медицинада, негизинен дене өсүшүн изилдөөдө, айрыкча балдардын өсүшүн текшерүүдө өзгөчө мааниге ээ. Анткени ал – организмдин өсүшүнүн жана калыптанышынын көрсөткүчү. Бир жашка чейинки баланын бою, салмагы, баш, көкүрөк курчоосу ж.б. ай сайын, мектепке чейинки балдардыкы жылына кеминде 2 жолу, окуучулардыкы жыл сайын өлчөнөт. Мындай текшерүүлөр балдардын өсүү жана өөрчүшүндөгү кемчиликти өз убагында табууга мүмкүндүк берет. Антропометрия кишилерди диспансерлөөдө, армияга чакырылгандарды, спортчуларды медициналык текшерүү жүргүзүүдө пайдаланылат. Антропометрия криминалистикада жана сот медицинасында да чоң мааниге ээ.