АБОРТ

АБОРТ (лат. Abortus), б о й д о н т ү ш ү ү – бойго бүткөн түйүлдүктүн (22 жумага чейинки) бойдон түшүшү. 12 жумага чейин түшсө – эрте, 22 жумага чейин болсо кеч аборт деп аталат. Бойдон түшүү ар кандай оорунун кесепетинен болот, кээде кандайдыр бир себептерден аялдын кош бойлуулугун сактоо мүмкүн болбогондо, ошондой эле кош бойлуулук жана төрөт аялдын ден соолугу менен өмүрүнө коркунуч туудурса, жасалма жол менен жүргүзүлөт. Жасалма аборт аялдын өз эрки боюнча (12 жумага чейинки) дарылоо мекемелеринде жасалат. Эгер кош бойлуулук аялдын ден соолугуна жана балага коркунуч туудурса, анда чоң мөөнөттө да аборт жасоого уруксат берилет. Жасалма аборт организмге зыяндуу, анткени кош бойлуулук менен байланышкан физиологиялык процесстер капысынан токтоп, кээде нерв, эндокрин системасынын, зат алмашуунун бузулушуна алып келет. Өзгөчө биринчи жолу боюнда болгон, этек кир цикли бузулган жана жыныс органдары начар жетилген аялга аборт өтө зыяндуу. Аборттон кийин кабылдап кетүүдөн жатын жана анын кошумчалары сезгенүүгө учурайт. Жатын түтүгү сезгенгенде ал жабышып калат да, жатындан тышкары бойго бүтүү же таптакыр төрөбөй калуу мүмкүн. Өзүнөн-өзү бойдон түшүү түрдүү оорунун кесепетинен болот. Ага жатындын сезгениши, шишик оорулары, жыныс органдарынын начар жетилиши, жугуштуу оорулар, эне менен баланын канынын туура келбестиги, өтө катуу талгак болуу, ошондой эле мурдагы Аборттор себеп болот. Мында түйүлдүк жатындын ички бетинен акырындык менен ажырай баштайт. Жатын булчуңдарынын жыйрылышынан ичтин ылдый жагы, бел сыздап, толгоо келип, кан кете баштайт. Дарылоо эрте башталса, түйүлдүктү сактап калууга болот. Дарылоо өз убагында жүргүзүлбөсө кан агуу күчөп, кансыроого алып келиши мүмкүн. Кээде түйүлдүк толук түшпөй, анын бөлүктөрү калып, жатын жыйрыла албай, кан көп кетип, аялдын өмүрүнө коркунуч туулат. Мындай учурда жатынды тазалоо ооруканада жүргүзүлөт. Эгерде эки ирет же андан көп бойдон түшсө, өнөкөт аборт деп аталат. Эгер аборт сезгенүү (инфекция) менен коштолсо септикалык аборт делет. Мындай кабылдоолор аялдын өмүрүнө чоң коркунуч туудуруп, сепсиске алып келет.