АТЫРАУ ОБЛУСУ

АТЫРАУ ОБЛУСУ (мурдагы Гурьев облусу) Казакстан Республикасынын түндүк-батышында. 1938-ж. 15-январда түзүлгөн. Аянты 118,6 миӊ км². Калкы 555,2 миӊ (2013). Атырау облусунун курамында 7 администрациялык район, 2 шаар, 15 шаарча бар. Борбору ‒ Атырау шаары. Каспий бою ойдуӊунда жайгашкан; түндүгүнөн Каспий деӊизи менен чулганат. Климаты кескин континенттик. Январдын орточо температурасы ‒3,5°…‒5°Сге чейин, июлдуку 24°‒25°С. Шамал дээрлик тынымсыз согуп турат (орточо ылдамдыгы 6‒7 м/сек). Жылдык жаан-чачыны 150‒200 мм. Башкы дарыялары: Урал жана Эмба. Ири көлдөрү: Индер, Жамансор, Айгыр-Көл ж. б. Туздуу көлдөр да кездешет. Күрөӊ, шортоӊ жана шор топурактуу. Дан өсүмдүк-шыбактуу жарым чөл жана шыбак-баялыштуу чөл ландшафты мүнөздүү. Негизги өнөр жай тармактары: нефть, химиялык, балык. Облустун аймагынан нефть жана газдын ири кени табылган. Индер көлүндө калий тузунун мол запасы бар. Айыл чарбасынын негизги тармагы ‒ кой чарбасы; ошондой эле уй, жылкы, төө асыралат. Тоют жана жашылча-бакча өсүмдүктөрү өстүрүлөт. Атырау ‒ Орск, Атырау ‒ Уральск, Атырау ‒ Шевченко нефть куурлары бар. Каспий деӊизинде мезгил-мезгили менен кеме жүрөт.