АЙДАРБЕКОВ Иманаалы
АЙДАРБЕКОВ Иманаалы (1894, Бишкек уезди – 1937) – саясий жана мамлекеттик ишмер; Совет бийлигин орнотуу жана чыңдоо үчүн жигердүү күрөшкөндөрдөн. 1909‑жылы Пишпектеги айыл чарба техникумун бүтүргөн. 1918–20‑жылдары Пишпек уезддик-шаардык совет аткомунун, 1920–21‑жылдары Каракол уезддик ревкомунун мүчөсү, 1921–23‑жылдары Пишпек уезддик советинин аткомунун төрагасы, 1923–24‑жылдары Жети‑Суу облустук жер бөлүмүнүн башчысы, облаткомдун төрагасы. 1924‑жылы Кыргыз автономия облусунун ревкомунун төрагасы болуп дайындалган. 1925–26‑жылдары Ташкентте «Орто Азия дан» кеңсесинде башкармалыктын мүчөсү болгон. 1927–29‑жылдарда Кыргыз АССРинин жеңил өнөр жай жана соода эл комиссары, 1930–31‑жылдарда Кыргыз айыл чарба банкынын башкармалыгынын мүчөсү, Кыргыз АССР юстиция эл комиссары, Кыргыз АССРинин Башкы сотунун төрагасы болуп иштеген.
Айдарбеков Советтердин болуштук, уездик, облустук съезддерине бир нече ирет делегат болуп шайланган. Ак‑Суу козголоңун, Нарындагы көтөрүлүштү басууга катышкан. Совет бийлигин чыңдоого жигердүү катышкандыгы үчүн Кыргыз АССР Борбордук аткомунун Ардак грамотасы менен сыйланган. 1937‑жылы жалган жалаа менен атылган. 1991‑жылы сөөгү Ата‑Бейит көрүстөнүнө ариет‑аза күтүү салты менен кайра коюлган.