АЗ КАНДУУЛУК

АЗ КАНДУУЛУК, а н е м и я– кызыл кан денечелериндеги гемоглобиндин азайышы менен мүнөздөлгөн оору. Ага канды көп жоготуу (да­роо же өнөкөт кан кетүүдөн), эритроциттердин, кан пайда болуунун бузулушу, денеде темирдин, кээ бир витаминдердин жетишсиздиги, сөөк чучугунун жабыркашы, ошондой эле айрым жугуш­туу оорулар себеп болот. Денеде В₁₂ витамини менен эритроциттеги гемоглобиндин, ферменттер­дин курамына кирүүчү темир аз болгондо Аз кандуулук көп кездешет. Көбүнчө кан көп кеткенден (этек кир, геморрой, карын жарасы ж. б.) болот. Көп төрө­гөн, баланы көпкө эмизген аялдарда, ошондой эле бала эттүү тамакты аз жегенде көп байкалат. Эненин денесинде темир аз болсо, эмчектеги бала­да да Аз кандуулук өнүгүшү ыктымал. Белгилери – эн­тигет, жүрөк катуу согуп, бат чарчайт, баш ай­ланып ооруйт, көз чыбырчыктайт, чач түшөт, тырмак сынат, ич өтөт, өңү, көз чели кубарып, кер сары тартат. Изилдөөдө эритроциттердин саны анча өзгөрбөй, гемоглобиндин саны азаят. Ооруну алдын алууда кан кеткен жерди өз уба­гында таап, токтотуу, туура жана темирге бай азык менен тамактануунун мааниси чоң. Темир­лүү дарылар менен узак, такай дарылануу керек.