АБДЫЛДА Дөөлөт уулу

АБДЫЛДА Дөөлөт уулу (1899, Ош облусу, Өзгөн району, Алга айылы – өлгөн жылы белгисиз) – манасчы. «Манас» айтууну жездеси Казыбай устадан үйрөнгөн. Ал дастандын көп эпизоддорун билген жана мыкты айткан. 1966–70-жылдары Абдылда Беки уулунан «Манас» эпосунун айрым эпизоддору (2427 сап ыр) жазылып алынган. Бул эпизоддор негизинен Манас жана анын кырк чоросу менен Алмамбеттин таанышышы, Алмамбеттин аларга кошулушу, Алмамбеттин кеңеши боюнча Манастын Каныкейге үйлөнүшү, алардын шаан-шөкөт менен Таласка көчүшү сыяктуу окуялардан турат. 1970-жылы Абдылдадан «Көкөтөйдүн ашы» (көлөмү 32 бет) жазылып алынган. Эпизод Көкөтөй өлүп, кара ашын берип, ага күмбөз салдырып, эми чоң ашын беребиз деген кеңештен башталат. Окуя ашка даярданып, Манас чоролорун ээрчитип, жолго чыгышы менен бүтөт.