АТАБАЕВ Аксуубай

АТАБАЕВ Аксуубай (22. 12. 1943, Ысык-Көл обл., Ак-Суу р-ну, Ак-Булуӊ айылы ‒ 12. 12. 2011, ошол эле жерде) ‒ белгилүү композитор, обончу, ырчы, КРдин эл артисти (2000). КРдин маданиятына эмгек сиӊирген ишмер (1988). Бишкектеги М. Күрөӊкөев атындагы музыкалык-хореографиялык окуу жайын (1970), Б. Бейшеналиева атындагы Кыргыз мамлекеттик искусство институтун 1979-ж. бүтүргөн. 1979‒82-ж. Т. Сатылганов атындагы Кыргыз улуттук филармониянын солисти, Респ-лык кесипчилик окуу жайларынын маданият ордосунун директору(1982‒2010) болуп эмгектенген. 200дөн ашык обондуу ырлардын автору. «Чагылган», «18 жаш», «Эне жөнүндө баллада», «Тоолор», «Кыргыз жери», «Жүрөк эӊсейт», «Курбуларга», «Айгүл ай», «Махабатым», «Таалайбек», «Белгисиз жоокер жөнүндө баллада» ж. б. ырлары белгилүү. Бир нече медалдар менен сыйланган.