АРГЕНТИНАЛЫКТАР
АРГЕНТИНАЛЫКТАР– улут, Аргентинанын негизги калкы. Жалпы саны 41 млн, анын ичинде 40 млн адам Аргентинада (2010). Парагвай, Уругвай, Мексика, АКШ, Чилиде да жашашат. Испан тилинин аргентина диалектисинде сүйлөшөт. Көпчүлүгү – католиктер. А. 16-к-да испан, кийин ар кошкон элдердин тукумдарынан куралган. Жерг. индейлердин көпчүлүгү баскынчылардан кырылып жок болушкан, калгандары болсо тез эле башка этностук топтор менен аралашып кеткен. 19-к-дын 60-70-ж-нда аргентина улуту пайда болгон. А-дын экон. маданий турмушунун өнүгүшүнө европалык иммигранттардын чоң таасири тийген. 1869-ж. калктын саны 1,9 млн болсо, 1914-ж. 7,9 млнго чейин өскөн жана анын этностук курамы өзгөрүлүп, калктын 30 %ин европалыктар түзүп калган. Экинчи дүйнөлүк согуш жылдарында жана согуштан кийин өнөр жайдын жогорулашына байланыштуу кыштактардан шаарга, өзгөчө Буэнос-Айреске А-дын массалык көчүп келүүсү күчөгөн. Калктын 80% шаарда жашайт. Кыштактагылар негизинен мал чарбачылык, дыйканчылык,
кол өнөрчүлүк менен кесип кылышып, фермерлер бышкан кыштан салынган үйлөрдө, кедейлер арзан фанерден салынган ранчолордо жашашат. Улуттук кийими пончо, булгаары өтүк жана шляпа.
Ш. Керимова