АЛТАЙ Айдарбек уулу

АЛТАЙ Айдарбек уулу (1872, Нарын өрөөнү - ө. ж. белгисиз) – төкмө акын. Элдик ыр казынасын мыкты билген. Фольклор жыйноочу К. Мифтаков 1922-ж. Алтайга жолугуп, «Замана», «Санат» ырларын, жарамазандарын, «Асан Кайгынын батасын», «Калмырза менен Найманбайдын», «Найманбай менен Бекназардын айтыштарын» Кайып-Булак деген жерден өз оозунан жазып алган. Ал Калыгулдан келаткан «Замана» тематикасына кайрылган. К. Мифтаков Алтайдын чыгармачылык ажары ачылып турган 50 жаш курагында жолукканы менен, анын билгендеринин баарын жазып алууга үлгүрбөгөн. Анын мурастарынын негизги бөлүгүн жарамазандар түзөт. Диний ырым-жырымдар «Ак үйлүү бай», «Доом бар», «Азирейил», «Дүнүйө», «Мукамбет»,«Жарамазан», «Орозо», «Чатыр-мутур», «Бата» ж. б. чыгармаларында кеңири чагылдырылган.