АК-ТҮЗ КЕНТАШ КАЛДЫГЫН САКТОО ЖАЙЫ

АК-ТҮЗ КЕНТАШ КАЛДЫГЫН САКТОО ЖАЙЫ Чүй обл-нун Кемин р-нундагы Ак-Түз кыш-на жакын жайгаштырылган. Ак-Түз мамл. акционердик коомуна караштуу. Төрт участоктон турат: биринчисинин аянты 40 миӊ м² (1942‒55-ж. иштеген), экинчисиники 130 миӊ м² (1971‒94-ж.), үчүнчүсүнүкү 30 миӊ м² (1965‒94-ж.), төртүнчүсүнүкү 158 миӊ м² (1978‒93-ж.). Төртүнчүсүнөн башкалары консервацияланган. Буларда Ак-Түз сейрек металлдар жана Борду полиметалл кендеринин рудасын иштетип, пайдалуу металлдарды бөлүп алгандан кийин калган, курамында коргошун, цинк, жез, торий ж. б., сейрек кездешүүчү металлдар, о. эле айрым минерал түрлөрү (хлорит, серицит, цитролит, циркон ж. б.) бар кенташ (руда) калдыктары сакталат. Гамма нурлануу өлчөмү 25‒40 мкр/с. Азыр тынч абалда (табигый жана антропогендик кийлигишүүсүз), экол. жактан коркунуч туудурбайт. Бирок, 1998-ж. жазында төртүнчү участоктун дамбасынан суу ашкандыгы байкалган. Ошондуктан көзөмөл жүргүзүп туруу зарыл.
Ад.: Геоэкологическая безопасность и риск природно -техногенных катастроф на территории Кыргызстана. Б., 1999.