АДАБИЙ МУЗЕЙЛЕР

АДАБИЙ МУЗЕЙЛЕР ‒ жалпы бир улуттун же өлкөнүн адабиятынын тарыхына, ошондой эле көрүнүктүү жазуучуларынын өмүрүнө, чыгармачылыгына байланыштуу улуттук тарыхый мааниге ээ документтер, кол жазмалар, түрдүү эскермелер жыйналып, сакталуучу маданий жай. Кыргызстанда музейлер 20-к-дын 20-жылдарында уюшула баштаган. Музейлер элдин тарыхый-маданий мурасын сактоонун жана даӊазалап жайылтуунун негизи болуп эсептелет, алар иш мүнөзү б-ча үч багытта жүргүзүлөт: 1) экспонат чогултуу, эсепке алуу, кайталоо, сактоо, бардык экспонаттарга ил. баяндама жазуу; 2) көрүүчүлөр үчүн даярдалган дайыма иштөөчү, илимий негизделген экспозициялар; 3) элдин маданий, тарыхый мурастарын экспозициялар, көргөзмөлөр, иш-чаралар аркылуу аларды ММКларда жарыялоо менен пропагандалоо. Кыргызстанда Токтогул атындагы адабият музейи (Бишкек ш.), А. Осмонов музейи (Панфилов р-ну), Ч. Айтматов музейи (Талас обл.) иштейт.