АГАТАН МИНЕРАЛДУУ СУУСУ

АШАТАН МИНЕРАЛДУУ СУУСУ‒ дарыланууга жана ичүүгө жарамдуу минералдуу суу булагы. Ош обл-нун Кара-Суу р-нунда, Агатан суусунун Жазы суусуна куйган жеринде, деӊиз деӊг. 2500 м бийиктикте жайгашкан. Жерг. элге илгертен белгилүү. 1976-ж. бургулоо жумуштары жүргүзүлүп, геол. маалымат алынган. Булак чыккан жерде юра мезгилинде пайда болгон алевролит, сланец, чопо, кумдук тоо тектери жатат. Алар бүктөлүүгө дуушарланып, кеӊдик багытта созулуп жаткан антиклиналды пайда кылган. Суу антиклиналдын түн. канатындагы тектон. жаракалардан агып чыгат. Суу тунук, туздуу, муздак (12°С), көмүр кычкыл газдуу (СО2‒ 0,1‒ 0,2 г/лге чейин). Бургулоо көзөнөгүнөн агып чыккан суунун чыгымы 0,5 л/сек, булактыкы ‒ 0,2 л/сек, аз минералдашкан. Курамы хлорит-гидрокарбонат-натрий-кальцийлүү. Сууну ичүү жолу менен ашказан, бөйрөк, боор ооруларын дарылоого болот.