АШКӨК

АШКӨК (petroselinum) ‒ өсүмдүктөрдүн чатыр гүлдүүлөр тукумунун сельдерей уруусундагы эки жылдык чөп. Биринчи жылы жалбырак розеткасы ж-а тамыры пайда болсо, экинчи жылы гүлдөп урук берет. Мекени Жер Ортолук деӊиз жээги. Тамыры ичке, сабагы тик өсөт, бийикт. 30‒150 см. Жалбырагы канат сымал, гүлү сары, топ гүлү чатырча. А-түн 4 түрү бар, анын экөө ‒ жалбырактуу ж-а тамырлуу А. Тамак-ашка тамыры, жалбырагы колдонулат. Жалбырактуусу сортуна жараша жалбырагы буралган тармал же жөнөкөй болот. А-түн курамында эфир майлары, витаминдер, өзгөчө С витамини көп, тамырында К, Са, Аe, P туздары бар. Ошондуктан жүрөк, бөйрөк ооруларында сууну азайтуу максатында, боор оорусунда, организмдин иммунитетин жогорулатууда колдонулат. А. бардык зоналарда, айрыкча күнөстүү, топурагы жумшак, күрдүү жерлерде өсөт. Бир гектар жерге тамырлуусунун 2 кг, жалбырактуусунун 8 кг үрөнү себилет. Убагында сугарып, отоо чөптөн арылтып, жумшартуу ж-а кошумча азык берүү зарыл.