БАБА-АТА КЫРКА ТООСУ

БАБА-АТА КЫРКА ТООСУ Тескей Ала-Тоонун батышында. Түндүгүнөн Кочкор, түштүгүнөн Базар-Турук ж-а Төлөк өрөөндөрү м-н чектешет. Уз. 45 км, орт. бийикт. 4100‒4300 м, эӊ бийик жери Баба-Ата чокусу (4400 м). Палеозойдун кристаллдык ж-а гранит тоо тектеринен турат. Рельефи татаал, 4000 мден жогору нивалдык -гляциалдык формалар мүнөздүү. Капталдары тик (35‒40°), батышы аскалуу. Чыгыш бөлүгү басаӊдап, Карагатты, Сандык тоолоруна өтөт. Борб. бөлүгү мөӊгүлүү. Тескей капталынан бир нече майда суу (Кош-Көл, Бөрүлү-Булак ж. б.) агып түшүп, Узун-Булак суусуна куят. Бөгөлмө-Булак ж-а Көл-Булак өзөндөрүндө бөгөлмө көлдөр бар. Батышы ичкерип, Кызарт белине барып такалат. Түзүлүшү б-ча кыска горст-мегантиклиналь. Түн. этегинен тектон. жарака өтөт. Муз доорунда тоонун үстү ири муз калканы м-н капталган. Түш. капталы каксоо, талаа чөптөрү (бетеге, шыбак ж. б.) өсөт; чыгышындагы коктулары майда бадалдуу. Түн. беттерине талаа (2600‒3200 м), субальп шалбаалуу талаа (3200‒3600 м), альп шалбаа (3600‒3800 м), субниваль (3800‒4200 м), нивалдык-гляциалдык ландшафттары (4200‒4400 м) мүнөздүү. Жайыт.

Т. Кулматов.