АЙБОЛЧО АПАТИТ КЕНИ

АЙБОЛЧО АПАТИТ КЕНИ –Талас облусунун Манас районунда, Арал кыштагынан 4 км аралыкта, деңиз деңгээлинен 1200–1370 м бийиктикте. Апатит минералдашуусу соңку протерозой мезгилинде пайда болгон горнблендит массивинде чачыранды түрдө кездешет. Апатиттин уя сымал топтолушунун көлөмү 1–2 смден 2,5 смге чейин. Пайдалуу аянттын узундугу 900 м, туурасы 65 м, запасын эсептөөнүн тереңдиги 100 м. Апатиттин (фторапатиттин) орточо өлчөмү 4,41%. Фосфордун беш окисинин өлчөмү бороз сынамыктарында 1,27–3,68%. Эки технолологиялык сынамыкты изилдөөнүн негизинде 32,48% өлчөмүндө фосфордун беш окисинин сапаттуу концентраты алынган. Апатит кенташын агрохимиялык сырьё катары пайдаланса болот. Болжолдуу кенташ (руда) ресурсу 17,5 млн т, фосфордун беш окиси 0,35 млн т. Кен ачык казып алууга ыңгайлуу.