АЛТЫМЫШБАЕВ Асылбек

АЛТЫМЫШБАЕВ Асылбек [(1. 5. 1912, Россия империясы, Жети-Суу областы, Тилекмат айылы, азыркы Ысык-Көл облусу, Жети-Өгүз району, Калматай (Шалбаа) айылы – 1987, Фрунзе)] – философ, Кыргыз ССР ИАнын академиги (1954), философия илимдеринин доктору (1961), профессор (1962), Кыргыз ССРинин илимге эмгек сиңирген ишмери (1973). Кыргыз мамлекеттик педагогикалык институтун бүтүргөн (1942). Кыргызстан КП БКнын алдындагы республикалык партиялык мектебинин философия кафедрасынын башчысы (1948–49). СССР

ИАнын Кыргызстандагы филиалынын Тил жана тарых институтунун директору (1949–50), филиалдын Президиумунун төрагасынын биринчи орун басары (1950–52), Кыргызстан КП БКнын илим жана маданият бөлүмүнүн башчысы (1952–54), Кыргыз ССР ИАнын вице-президенти, Философия жана укук институтунун директору (1954–66), улук илимий кызматкери (1966–75). 1975–87-жылдары институттун директору болуп иштеген. 1960-жылдан республикалык «Билим» коомунун төрагалык кызматын да аткарган. СССР (5-шайланышы), Кыргыз ССР Жогорку Советтеринин (3-, 4-, 6-шайланышы) депутаты жана Кыргыз ССР Жогорку Советинин Президиумунун мүчөсү болгон. Алтымышбаевдин илимий эмгектери Орто Азия элдеринин социалдык маданиятынын калыптануу, өнүгүү мыйзам ченемдеринин айрым теориялык маселелерин, кыргыз элинин коомдук-саясий жана философиялык ой-пикиринин өнүгүү тарыхын изилдөөгө арналган. 60тан ашык илимий эмгектин автору. Эмгек Кызыл Туу, «Ардак Белгиси», Эл Достугу ордендери менен сыйланган.

Эмг.: Октябрь и развитие общественного сознания киргизского народа. Фр., 1980; Интернациональное и национальное в социалистическом образе жизни советского народа. Фр., 1982; Очерк истории развития общественно-политической мысли в дореволюционной Киргизии. Фр., 1985.