АБЕРДИН-АНГУС УЮ

АБЕРДИН - АНГУС УЮ - ири мүйүздүү малдын эт багытындагы породасы. Шотландиянын катаал климаттуу тоолуу районундагы Абердин графтыгынын кара токол уюн жана Ангус графтыгынын күрөң уюн аргындаштыруудан алынган. Эти өтө даамдуу, чыктуу, тез жетилет, абдан тукумчул, тукум куугучутугу туруктуу жана чөйрөгө жакшы ынгайланышына жараша бул порода дүйнөдө таралышы боюнча экинчи орунда. Ал Түндүк жана Түштүк Америка, Океания, Европада багылат. КМШ өлкөлөрүнө 1932-жылы Англиядан алынып келинген. Калмак ую, ошондой эле сүт, эт-сүт багытындагы уйлар менен аргындаштырууда пайдаланылган. Уй токол, кара (кээде кызыл-күрөң) түстө. Букасынын бийиктиги өркөчүнөн 125-130 см, уйу 120-125 см. Букасынын тирүүлөй салмагы 750-800 кг, уйу 500-550 кг. Жаңы туулган музоосунун салмагы 28-30 кг. Бордолгон 14-15 айлык торпогунун тирүүлөй салмагы 400-450 кг, союлганда 58-60% эт алынат. АКШда Абердин-ангус уюнун бою бийик тиби чыгарылгын. Анын өркөчүнүн бийиктиги 145-147 см, тирүүлөй салмагы 1000 кгга жетет. КМШ өлкөрүндө асыл тукум чарбаларында малды аргындаштырууда пайдаланылат.