АКЦИЯ

АКЦИЯ (лат. actio ‒ аракет, иш, операция) ‒ акционердик коом (АК) тарабынан жүгүртүү үчүн чыгарылуучу жана анын ээсине (акционерге ) АКнын кирешесинин бир бөлүгүн дивиденд түрүндө алууга, АКны башкарууга үлүштүк катышка, АК жоюлган учурда калган мүлктүн бир бөлүгүн, ошол коомдун жаӊы чыккан акцияларын адегенде алууга, рынокто эркин сатып алуу ‒ сатууга укук берүүчү баалуу кагаз. Акцияда көрсөтүлгөн акча суммасы анын номиналдык наркын, ал эми Акция курсу ‒ баалуу кагаздар рыногунда Акция жүгүртүлүүчү бааны (рынок наркы) билдирет. Акция төмөнкү реквизиттерди камтыйт: баалуу кагаздын аталышы; эмитенттин аталышы жана анын жайгашкан орду; катар номери; номиналдык наркы; чыгарылган акциялардын саны; чыккан датасы; түрү (жөнөкөй же артыкчылыктуу); чыккан датага карата АК уставдык капиталынын өлчөмү; дивиденддерди төлөө мөөнөтү; ээсинин аты-жөнү (даректүү акция үчүн); каттоочунун жана банк-агенттин аталышы жана жайгашкан орду; эмитенттин колтамгасы жана мөөрү. Акция фонд биржаларында жана фонд рыногунун компьютердик биржадан тышкаркы системасы аркылуу адис ортомчулардын (брокерлердин жана дилерлердин) жардамы менен сатылат жана сатып алынат. Кыргызстанда акционердик коомдор пайда болгондон тартып Акция чыгарыла баштады.