АГЫМ

АГЫМ, а г ы н ‒ суунун нук менен агуу кыймылы. Жер бетине түшкөн жаан-чачындан, кар жана мөӊгүнүн эришинен пайда болгон суулар эӊкейишти карай сарыгып агып, бирине бири кошулуп, улам чоӊоюп олтуруп, туруктуу нукка куюп, агын сууларды пайда кылат. Агын суулар бири бирине кошулуп, дарыяны жаратат. Дарыя көлгө, деӊизге, океанга куят. Бул процесстер Агымдын пайда болуу же Агымдын калыптануу процесси деп аталат. Убакыт бирдиги ичинде (жыл) агып келип, океанга кошулган суу да «дарыя агымы» деп аталат. Ал эми суунун нук аркылуу агуу кыймылын ‒ «агын» деп атоо ылайык.