АБРАМОВ МӨҢГҮСҮ

АБРАМОВ МӨҢГҮСҮ – Алай кырка тоосунун түш. капталындагы татаал өрөөн тибиндеги мөңгү. Көк-Суунун алабында. Уз. 9,0 км, туурасы 500–1000 м, аянты 22,8 км² . Абляциясынын аянты 6,9 км². Мөңгүнүн башы деңиз деңг. 4960 м, этеги 3670 м бийиктикте жатат. Кар чегинин бийикт. 4150 м. Куралуу облусу (14,6 км²) желпүүр сымал жайгашкан көп салаалуу жазы төрдү элестетет. Эл аралык программа б-ча мурдагы СССРдин аймагындагы 1-даражадагы байкоолор жүргүзүлө турган мөңгүлөрдүн катарында болгон. 1972-ж. жана 1985-ж. кескин алдыга жылган, мындай жылыштар 10–11 жылда Күндүн активдүүлүгүнө жараша кайталанып турат. Мөңгүдөн Кызыл-Суунун оң куймасы Көк-Суу башталат. Мөңгү Фергана обл-нун губернатору (1876–80-ж.) А. К. Абрамовдун ысмынан аталган.