АДЕП ТАРБИЯСЫ

 – адамдын коомдогу морал­дык аң‑сезимин жашоодогу максатка жараша калыптандыруу, ызааттуу жүрүм‑турум көнү­мүштөрүн пайда кылуу, о. эле өз элинин үрп­-адаттарынын прогрессивдүү үлгүлөрүн сактоого, байытууга, башка улуттардын салтын урмат­тоого тарбиялоо. Адамдын эрки м‑н рухий бай­лыгынын шайкеш келиши адептүүлүккө жатат. А. т. эмгекке ж‑а коомдук мүлккө туура мамиле жасоо, достукка, чынчылдыкка, адептүүлүккө ж‑а ар ким өзүнүн жүрүм‑турумуна сын көз м‑н кароого ж. б. кемчиликтерин адилет сын­доого үйрөтөт. Ал коомдук аң‑сезимдин эң маанилүү формасы болуп саналат. Адам өмүр бою тарбияланып такшалат, ошентсе да, тарбиянын башаты, жүрүш‑туруштун тигил же бул эреже­лерине калыптануусу негизинен балалык, өспү­рүм кезинен башталат. Мезгил өткөн сайын бул адат өркүндөп‑өрчүй берет. Ар бир коомдун өзүнүн социал. түзүлүшүнө жараша адептүүлүк эрежелери болот.