АШЕЛЬ ДООРУ

байыркы палеолиттин экинчи баскычы. Франциядагы Амьен ш-на жакын Сент-Ашель жергесинен табылган байыркы эстеликтин аты м-н аталган. А. д-нун байыркылыгы мындан 800‒120 миӊ жыл мурдагы мезгилге барабар. А. д. эрте, ортонку ж-а соӊку болуп бөлүнөт. Ал мезгилде архантроптор, палеоантроптор ж-а алгачкы HOMO SAPIУNSтер жашашкан. Ашель эстеликтери Африкада, Алдынкы ж-а Түш. Чыгыш Азияда, Батыш Европада кездешет. Ири жаныбарларга аӊчылык кылуу биримдикти ж-а жакшы куралданууну талап кылган. Таш куралдары ар кандай иштерди аткарууга багытталып жасала баштаган. Турак жайлардын ар кандай чарбалык иштерге багытталган түрлөрүн айырмалоого болот (мис., аӊчылык турак жайлар, таш иштетүүчү устаканалар). Ашель адамдары отту колдонушкан. Кырг-ндагы эӊ байыркы эстеликтер (Саламат-Булак, Ак-Өлөӊ, Сел-Үӊкүр) А. д-на таандык.

К. Табалдиев.