АК-САЙ - тарыхый топоним

АК-САЙ ‒ жердин аты, тарыхый топоним. Махмуд Кашгари (11-кылым) анын Уч (азыркы Үч-Турпан) округунун аймагына жакын экенин билдирет. Орто кылымдагы адабияттарда Ак-Сайга чектеш же жакын жаткан Торугарт ашуусу, Ат-Башы шаары, Арпа-Йасы талаасы, Таш-Рабат кербен сарайы жана башка аталат. Буга караганда байыркы Ак-Сай азыркы Ак-Сай сыртына туура келери шексиз. Ак-Сай өрөөнүн жергиликтүү көчмөн эл эзелтен эле пайдаланып келген. Көк-Аргын менен Сары-Иймектен табылган неолит мезгилинин буюмдары буга ачык далил боло алат.