АЛ-МАКДИСИ

АЛ-МАКДИСИ [толук аты-жөнү  Шамс ад-Дин Абу Абдаллах Мухамад ибн Ахмад ибн Аби Бакр ал-Банна аш-Шами ал-Мукаддаси (ал-Макдиси) ал-Башшари (945/946-жылдар, Аббассиддер халифаты, Иерусалим – 1000-жылдар Фатимиддер халифаты (азыркы Египет), Каир]– араб географы, саякатчы. Өзү тууралуу эмгектеринде бир аз маалымат калтырганы болбосо, так өмүр баяны анча белгисиз. Ата-бабалары курулуш куруучулардан болгону белгилүү. Иерусалимде (арабча  «Мадина Байт ал-Макдис» – Храмдар шаары) туулганына байланыштуу «ал-Макдиси» (б. а. Макдисилик) деген кошумча ысымга (арабча – нисба) ээ болгон. Жыйырма жашында ажылыка Мекеге барып сыйынгандан кийин саякаттап, көптөгөн мусулман өлкөлөрүн кыдырып чыккан. Көргөндөрүнүн баарын өзүнүн 985/986 же 988/989-жылдары жазылган «Аймактар тууралуу маалымат бере турган бөлүмдөр» (кара: Ахсан ал-такасим фи ма’рифат ал-акалим) деген эмгегинде чагылдырган. Орто Азиянын географиясын жана тарыхын окууда ал-Макдисинин бул эмгеги баалуу тарыхый булактардын бири болуп эсептелет.

Ад.: Крачковский И. Ю.  Избранные сочинения, Т. IV. Л., 1956; Сериков И. И. Ал-Мукаддаси //Восточное историческое источниковедение и вспомогательные исторические дисциплины, Вып. 2. М., 1994.