АРСЫГУЛОВА Жумакалый
АРСЫГУЛОВА Жумакалый (1922-жыл, Чүй облусу, Coкулук району, Төш-Булак айылы – 1948-жыл, Фрунзе шаары) – туңгуч балет бийчиси. Кыргыз ССРинин эмгек сиңирген артисти (1945). Алгач медициналык окуу жайда, 1934-жылы Ленинград шаарындагы хореографиялык окуу жайында окуган. 1939-жылы Москва шаарында өткөн кыргыз искусствосунун он күндүгүнө катышкан. 1941-жылы Улуу Ата Мекендик согуш башталгандыктан, Фрунзе шаарына келип, Кыргыз музыкалык театрында (азыркы Кыргыз мамлекеттик опера жана балет театры) иштей баштаган. Балетмейстер В. Козлов койгон А. Крейндин «Лауренсия» балетинде башкы партияны, М.Раухвергердин «Чолпон» балетинде Айдайды аткарган. М. Күрөңкөев атындагы Кыргыз мамлекеттик музыкалык хореографиялык окуу жайында педагог болуп иштеген. «Ардак Белгиси» ордени менен сыйланган.
