АЛЬПИНИСТ МӨҢГҮСҮ

АЛЬПИНИСТ МӨҢГҮСҮ – Борбордук Теңир-Тоодогу төр-өрөөн тибиндеги мөңгү. Кайыңды-Катта кырка тоосунун чыгыш учунун түштүк капталында, Теректи суусунун (Көйкаптын куймасы) башында. Узундугу 5,6 км, аянты 3,5 км². Мөңгүнүн башы деңиз деңгээлинен 5520 м, этеги 3940 м бийиктикте жайгашкан. Кар чегинин бийиктиги 4510 м. Абляциясынын аянты 1,2 км. Мөңгү күнгөй бетте жайгашкандыктан эрип, тартылууда. Калың этек моренасы негизги мөңгүнүн четине чейин созулуп жатышы мурда ал Көйкап мөңгүсүнүн бир тармагы болгондугун айгинелейт. Андан башталган суу Көйкап мөңгүсү аркылуу Теректиге куят.