АКАЕВ Кубаныч
АКАЕВ Кубаныч (7. 9. 1919-жыл, Чүй облусу, Кемин району, Кызыл‑Суу айылы – 19. 5. 1982-жыл, Бишкек шаары) акын, Кыргыз Республикасынын маданиятына эмгек сиңирген кызматкер (1979). Кыргыз мамлекеттик педагогикалык институтун бүтүргөн (1939). 1939–1941‑жылдары «Кызыл Кыргызстан», «Кыргызстан пионери» гезиттеринин, республикалык «Адабият жана искусство» журналынын адабий кызматкери, 1942–1947‑жылдары Кыргыз радиосунда адабий драма бөлүмүнүн жооптуу редактору, Бишкек шаарындагы хроника‑даректүү фильмдер студиясында башкы редактор, 1947–1952‑жылдары Кыргызмамбастын көркөм адабият редакциясында редактор болуп иштеген. 1938‑жылдан баштап ырлары республикалык гезит‑журналдарга чыга баштаган. Жыйнактары: «Жылаажын» (1941), «Тоо ыры» (1942), «Салют» (1943), «Бакыт жөнүндө баян» (1945), «Эмгек шаңы» (1950), «Сүйүү жана мара» (1958), «Бакыт гимни» (1960), «Өлбөстөр баяны» (1964), «Турмуш дастаны» (1967), «Сүйүү жарыгы» (1969), «Кыял канаты» (1971), «Ырым – адам», «Кубаныч» (1979), «Майрам» (1981), «Жүрөк күүсү» (1983) жана башкалар. Анын поэзиясына атуулдук публицистикалык бийик маанай мүнөздүү. Акындын бир нече жыйнактары орусчага которулуп басылган. «Ардак Белгиси» ордени жана медалдар менен сыйланган.