АХУНБАЕВ Мустафа Исаевич

АХУНБАЕВ Мустафа Исаевич (12. 3. 1935, Ташкент ш.) ‒ ырчы, режиссёр. КРдин эл артисти (1992), КРдин искусствосуна эмгек сиӊирген ишмер (1975). А. Малдыбаев атн. сыйлыгынын лауреаты (1988).

1961-ж. Москвадагы П. Чайковский атн. мамл. консерваториянын ырдоо классын бүтүргөн. 1961‒69-ж. Кыргыз мамл. акад. опера жана балет театрында ырчы. 1969-ж. Ленинграддагы Н.Римский-Корсаков атн. мамл. консерваториянын опера режиссёру классын бүтүргөн. Окуп жүргөндө эле Киров атн. опера жана балет театрында режиссёр-ассистент катары «Садко» операсын коюуга, «Ленфильмде» экинчи режиссёр жана актёр катары А. Бородиндин «Князь Игорь» көркөм фильмин тартууга катышкан. 1969‒70-ж. Кыргыз мамл. опера жана балет театрында коюучу-режиссёр, 1970‒71-ж. «Кыргызтелефильмде», 1971‒75-ж. СССРдин ГАБТта жана Кремлдеги съезддер дворецинде режиссёр болуп эмгектенген. ГАБТтын башкы режиссёру, Б. А. Покровский менен экинчи режиссёр катары «Руслан менен Людмила» операсын койгон. 1975‒2002-ж. чейин Кыргыз улуттук опера жана балет театрында башкы режиссёр болуп иштеген. 25 опера, «Ала-Тоо жазы» фестивалынын концерттерин койгон. 1984‒93-ж. театрда иштөө менен бирге Б. Бейшеналиева атн. Кыргыз мамл. иск-во ин-тунда, 1993-жылдан Кыргыз улуттук консерваторияда проф. (1988). Театр коллективи менен чет өлкөлөрдө гастролдо болгон. «Өлбөстүк», «Саманчы жолу», «Тынч Дон», «Петр I» аттуу спектаклдерди мыкты койгондугу үчүн Бүткүл союздук конкурста биринчи даражадагы диплом жана бир нече медалдар менен сыйланган.
Б. Алагушов.