АХВАЗ НЕФТЬ КЕНИ

АХВАЗ НЕФТЬ КЕНИ ‒ нефтинин дүйнөдөгү ири кендеринин бири. Ирандагы Ахваз шаарына жакын жайгашкан. 1958-ж. ачылып, ошондон бери казылып алынууда. Кен Перс булуӊу нефть-газ бассейнине кирет. Нефть-газдуу аймактын аянты 400 км²ден ашат. Нефть-газ антиклиналдык бүктөлүүдөгү олигоцен ‒ төмөнкү миоцендин кумдук жана жогорку бордун акиташ тегине топтолгон. Алар 2485‒3660 м тереӊдикте жатат. Нефть жана газ негизинен калыӊдыгы 200 м келген кумдуктан казып алынат. Нефтилүү тоо тектер тегиз эмес кабат түрүндө жайгашып, анын үстүнө газ топтолгон. Нефтинин тыгыздыгы 865‒901 кг/м³, күкүрт 1,5%. Нефтинин баштапкы чыгарып алуу запасы 2400 млн т, газдыкы 311млрд м³.