АРКАН

АРКАН– койдун кылчык жүнүнө жылкынын жал-куйругунан, эчкинин, топоздун кылынан кошуп, үч эшим менен чыйратылып жасалган жоон жип. Аны эшүүдө алгач жүндүн кылы таралып, түйдөктөлөт. Эшилүүчү жиптер үч катталып, оңго чыйратылат да, толгоосу солго имерилет. Үч адам чыйратып, бирөө эшилип жаткан арканды толгойт. Ap бир кулач Аркан эшкенде, ал болжол менен жарым кулачка кыскарат. Жердиги боюнча к ы л Аркан (жылкынын куйрук-жалынан бир аз кылчык жүн аралаштырылып эшилет), жүн Аркан (койдун, эчкинин жүнүнөн эшилет) деп бөлүнөт. Кийин кыргыз турмушунда к е н д и р Аркан (өсүмдүк буласынан), з ы м Аркан (металл), өзгөчө синтетика Аркан кеңири пайдаланылып калды. Күндөлүк тиричиликте мал аркандоодо, козу-улактарды көгөндөөдө, кулундарды желеге байлоодо, буюмдарды таңууда, боз үйдү унаага артууда, аркан тартмай, алты бакан ж. б. улуттук оюн-зооктордо да колдонулат. Кээде Аркан катары чылбыр да пайдаланылат.