АЛАЙ ИСКЕНДЕРАСЫ

АЛАЙ ИСКЕНДЕРАСЫ (Iskandera alaica) ‒ өсүмдүктөрдүн кайчылаш гүлдүүлөр тукумунун өтө сейрек учуроочу эндем түрү. Көп жылдык. Сабагы көп, түп жагы жалбыраксыз, жыгачка айланган, бийикт. 20(50) см. Өсүмдүктүн бүт органы боз түк менен капталган. Жалбырагы узата жумуртка сымал, сабагынын түп жагына топтолуп өсөт. Гүл жандоочтору сыя түстө. Июнь айында гүлдөйт. Топ гүлү ‒ саадак, жазы, узундугу 6 см, эни 5‒8 мм. Алай өрөөнүнүн Кашка-Суу алабындагы Кызыл-Эшменин чополуу капталдарында кездешет. Уругу менен көбөйөт. Кыргызстандын Кызыл китебине катталган.